डा. केसीको समर्थनमा माइतीघरमा पनि अनशन
चिकित्सा शिक्षा क्षेत्र सुधारका लागि विभिन्न माग राख्दै सात दिनदेखि आमरण अनशनमा रहेका प्राध्यापक डाक्टर गोविन्द केसीको समर्थनमा काठमाडौंमा रिले अनशन सुरु भएको छ । प्रा.डा. केसीले उठाएका मागमा सरकार तथा सरोकारवाला निकायहरू संवेदनशीन नभएको रिले अनशनमा सहभागिले गुनासो गरेका छन् । एमआरआर र सोलिडारिटी फर डा. जिकेसी एलाएन्सको संयुक्त पहलमा माइतीघर मण्डलामा पनि रिले अनशन सुरु गरेको एमआरआरका सदस्य सन्तोष थापाले बताए ।
उनले भने ‘केसीका माग पुरा गराउन सरकारलाई दबाब दिन रिले अनशन सुरु गरेका हौं । पछि आमरण अनशन पनि सुरू गर्न सकिन्छ ।’ शनिबार ३ बजेदेखि सुरु भएको रिले अनशनमा एक पटकमा सात जना बसेको छन् भने ६/६ घण्टामा अनशनमा सहभागि फेरिन्छन । जिल्ला प्रशासन कार्यालयलाई जानकारी गराई अनशन बसेका उनीहरुले डा. केसीको माग पुरा नहुँदासम्म अनशन जारी राख्ने बताए । पटक पटक अनशन बस्दै आएका डा. केसीले ११औं पटकको अनशनमा चिकित्सा शिक्षा ऐन पारित हुनुपर्ने मुख्य माग राखेका छन् । ११औं अनशन सुरु गरेका डा. केसीको ७ दिन पुग्दा उनको स्वास्थ्य अवस्था कमजोर हुँदै गएको छ ।
